Sunday, January 12, 2014

[فرى لانسنج][الجزء الخامس][تحديد سعر الساعة الواحدة ؟؟]



- المرة اللى فاتت كنا اتكلمنا عن ازاى تحدد سعر المشروع وتحدد مدته طيب جميل دلوقتى هنيجى لحاجة مهمه جدا وهى انا عشان اعرف احدد سعر المشروع لازم اعرف هياخد كام ساعه واعتقد دى لبعض الناس سهله بأنهم يقسموها تاسكات وهكذا زى ماتكلمنا المرات اللى فاتت او ع الاقل يسأل حد , طيب تانى حاجة لازم اعرف سعر الساعه بتاعتى .. عشان احدد سعر الساعه ده له اكتر من طريقه بس هنركز فى السلسلة دى على طريقتين بس تجنبا لاى لغبطه او تعقيد ع الناس ,
اول طريقه : هى انك تحدد ساعتك بناء على مجالك اللى انت فيه وعلى خبرتك وعلى برده المشروع ودى بالنسبة للناس اللى لسا مبتدئين صعبه شوية لانها بتطلب شوية خبره ومعرفة سابقه وكنت اتكلمت عن النقطه دى فى الجزء التالت
تانى طريقه : و دى اللى بفضل تمشوا بيها فى الاول بس تحكموا عقلكم فيها عشان متظلمش نفسك ولا تظلم العملا بتوعك , وهى انك بتجيب ورقه وقلم وبتحسب انك ناوى تشتغل كام ساعه يوميا وعلى ده بتحدد هتشتغل كام ساعه فى الاسبوع وفى الشهر (خد بالك فى اجازات زى يوم الجمعه مثلا او اى حد ممكن تعطلك ف اعملك احتياطاتك) بتشوف اجمالى الساعات اللى انت هتشتغلها فى الشهر , بعد كده بتشوف انت كامبتدأ محتاج تحقق دخل كام شهر 1000 جنيه 2000 وهكذا على حسب بعد كده هتقسم المرتب ده على عدد الساعات وبالتالى هيطلعلك سعر الساعه الواحده ..
اهم من ده اولا .. انك لازم تاخد بالك من انك متجيش تقول انا عايز احقق 10 الاف جنيه ف كده هتعلى السعر و ده براحتك طبعا لكن مفيش اى عملا هتجيلك او تقلل سعرك جدا ف العملا تشك فى خبرتك ومهاراتك ف الحالتين مرفوضين وحاول تبقى متوازن فى تحديد مرتبك
ثانيا .. انك تشتغل فعلا الساعات اللى انت محددها يوميا وتاخد اجازاتك اللى انت برده محددها عشان متظلمش نفسك ولا تظلمك غيرك .. اعتقد الطريقه دى سهله شوية عن اللى فاتت ويارب تكون افادتكم
والسلام عليكم ورحمه الله وبركاته

[فرى لانسنج][الجزء الرابع][تحديد تكلفة المشروع ؟؟]




- اول طريقه هى Time-based
يعنى بتشوف البروجكت ده هياخد كام ساعه عن طريق انك بتقسمه اجزاء وبتشوف كل جزء هياخد وقت اد ايه وفى الاخر بتحسب عدد الساعات الكلى وبعدين بتضرب عدد الساعات الكلى فى سعر الساعه الواحده (هتكلم عنها فى المقال الجاى بالتفصيل الممل عشان ليها اكتر من طريقه)
- تانى طريقه Project Type
يعنى بتشوف نوع البروجكت ده ايه ؟ بمعنى ؟ ان لو البروجكت ده لشركه غير انه يكون يكون لشخص او طالب مثلا
انت بتكون عامل نظام ال Packing, على سبيل المثال بتقول انا هعمل موقع مع اللوجو بتاعه بسعر فلانى وبتعرض خدمات دى وممكن تعمل عليها اوفر لناس معينه او لعملا انت اشتغلت معاهم قبل كده

- تالت طريقه هى Value-based
يعنى اهمية البروجكت ده والطلب عليه فى السوق ايه , يعنى لو البروجكت ده فى ناس كتير جدا بتعرف تعمله ف طبيعى انك تقلل السعر عشان المنافسه انما لو البروجكت قليل اوى اللى فاهم فيه او يعرف يعمله ف دى فرصتك انك تتعامل على النقطه دى

-رابع طريقه Running Project
بمعنى انك بتدور ع النت لبروجكت مشابه وتشوف معمول بكام وايه المعايير اللى خلت البروجكت بالسعر ده , او ببساطه تسأل حد متخصص وتعرف خبرتك اد ايه وتقوله عايز سعر مناسب للبروجكت ده

كل دى معايير عشان تقربلك ازاى تسعر البروجكت بتاعك , حاول تشوف بروجكت اوبن سورس ع النت وتتعامل على اساس ان فيه عميل طالبه منك وتسعر وتستشير الناس هل السعر ده مناسب ولا , يعنى درب نفسك كتير ع الموضوع ده
اسف ع الاطالة وان شاء الله المقال الجاى هيبقى ازاى تحدد سعر الساعه

-انا موجود لأى استفسار ان شاء الله
والسلام عليكم ورحمه الله وبركاته

[فرى لانسنج][الجزء التالت][تحديد مدة وسعر المشروع ؟؟]

-------------------------------------
السلام عليكم ورحمة الله وبركاته
كنا اتكلمنا فى الجزئين اللى فاتوا عن معنى الفري لانسنج و ازاى اهيأ نفسه له , غير اننا عرفنا الطرق اللى ازاى نقدر نجيب بيها العملا فى المجال بتاعنا .. طيب دلوقتى هنفترض ان جالنا العملا وبقه معانا مشروع , طبعا العميل بيطلب منك تكلفة المشروع ومدته و دى مشكله عند معظم الناس بيحاولوا يقولوا اقل سعر ممكن و ده بيخلى العميل يشك ف مهاراتك و انك بتقول اى سعر وخلاص وانت متعرفش تعمل حاجة ! .. ياما تقول سعر اعلى وده بيخلى العملا ياخد عنك انطباع انك استغلالى ومش هيتعامل معاك تانى وبالتالى انت خسرت مشروع وعميل .. ف دلوقتى انا هتكلم عن ازاى تحدد تكلفة المشروع ومدته (بنظام الساعات) بكل بساطه مثلا مطلوب منك موقع معين بتشوف خصائص الموقع ده وكل جزء تقدر تعمل ف اد ايه و تبقى عامل حسابك فى مده ازيد شوية احتياطى .. دلوقتى تعمل ملف اكسل عادى وتكتب فيه كل خصائص الموقع ده جزء جزء وتكتب ادام كل جزء من ده هياخد منك كام ساعه فى اليوم يعنى لو انت عامل حسابك هتشتغل 4 ساعات فى اليوم والجزء ده هياخد منك 20 ساعه ف كده معناه انك هتشتغل 5 ايام .. والجزء اللى بعده هتعمله نفس النظام لحد اخر المشروع ف مثلا طلع المشروع هياخد منك 100 ساعه وانت بتشتغل 4 ساعات فى اليوم ف كده المشروع هياخد منك 25 يوم .. طيب بالنسبة للتكلفة هتضرب ال 100 ساعه فى تمن الساعه الواحده .. جميل , ازاى احدد تمن الساعه بتاعتى ؟!! (سؤال حلو  ) .. ده بيعتمد على اكتر من حاجة :
- بتسأل الناس اللى اكبر مك واكتر خبره فى المجال ده وتشوف ساعتهم بتكون بأد ايه بحيث لا تبقى عامل تمن الساعه اعلى منهم بكتير ولا اقل منهم بكتير اوى انت بتقارن خبره الناس دى بخبرتك وانت ساعتها تقدر تحدد .. 
- بتشوف المشروع ده هل هو له اشخاص كتير جدا بيعملوه وممكن العميل يلاقى اى حد غيرك يشتغله فى المشروع ده ف ساعتها بتراعى المنافسه القوية وبتظبط سعرك على اساسه انما بقه انت لو محظوظ وناس قليله جدا او نادره بتشتغل فى الجزء ده ف ممكن تعلى السعر شوية لان العميل صعب اوى يلاقى غيرك يشتغله فى المشروع ده 
بالاخذ فى الاعتبار .. دايما افترض اسوأ ظرف يعنى متقولش الجزء ده هياخد منى 3 ساعات بالظبط لا ادى لنفسك وقت احتياطى عشان لو حصل اى حاجة عطلتك عن الشغل 

وبكده يبقى حددنا تكلفة و مده المشروع .. والسلام عليكم ورحمه الله وبركاته

[فرى لانسنج][الجزء التانى][ازاى اعمل اسم ليا فى السوق ؟؟]

السلام عليكم ورحمه الله وبركاته , كنا اتكلمنا المرة اللى فاتت عن معنى الفرى لانسنج و ازاى تجهز وتهيأ نفسك لدخول المرحله دى . دلوقتى هنيجى لحاجة مهمه جدا وهى ازاى تلاقى عملا فى المجال اللى انت شغال فيه؟! لان بدون عملا مفيش شغل :
-------------------------------------
طيب دلوقتى فى اكتر من طريقه عشان تلاقى عملا احنا كنا قولنا قبل كده من احد الحاجات عشان تشهر نفسك هى الكروت الشخصية و ده هيساعدك انك توصل للناس اللى حواليك وخليك على تواصل دائم بينهم بمعنى انك تعرفهم ايه تخصصك بالظبط وايه اخر مشاريعك يعنى من الاخر تعرفهم انت مين ؟! طبعا لو ليك علاقات بأفراد واصدقاءاو زمايل دراسه كتير ده هيسهل عليك جدا فى الاول انك تلاقى شغل و حاول تعرض عليهم بأستمرار شغلك و دى حاجة مهمه جدا فى الاول 
-------------------------------------
تانى حاجة : مواقع الفرى لانسنج زى Freelancer.com, oDesk, Elance وهكذا المواقع دى عباره عن عملا بتعرض مشاريع وانت بتقدم فيها وبتكلم العملا شخصيا (انا مش بفضل الطريق ده لاسباب كتير هنفصلها بعدين كلها)
-------------------------------------
اتواصل مع الناس عن طريق الفيس بوك مثلا والبيدجات , كلم اصحاب الشركات الجديده والصغيره واعرض عليهم خدماتك . كلم افراد او رجال اعمال .. او ممكن تتواصل معاهم عن طريق الايميلات المهم توصلهم خدماتك بصورة احترافية . للعلم بس ركز ع الفيس بوك والجروبات لان فى ناس كتير بتطلب مساعدات وشغل ع الجروبات دى وانا ان شاء الله هعمل قائمه مفصله بأشهر الصفحات والجروبات اللى ممكن تلاقى شغل من خلالها فى اول الطريق 
-------------------------------------
طريقه تانية .. و دى نقطه مهمه جدا وغير مستغلة عند الناس (لينكد ان- LinkedIn) دى شبكة اجتماعية لرجال الاعمال وللشركات وسهل جدا تلاقى ناس محتاجين خدماتك سواء افراد او شركات , كل اللى مطلوب منك انك تظبط البروفايل بتاعك وتنشر اخر اعمالك وتنشر معلوماتك وتعرف الناس الخدمات اللى انت بتقدمها . يعنى حاول تقضى وقت مع لينكد ان فعلا هيفيدك جدا 
-------------------------------------
تويتر : دة برده الغائب الحاضر انك ممكن من تويتر بس تعمل علاقات مع عملا ويبقى ليك سمعة فى مجالك لانك بتعمل تويتات بتعرف الناس شخصيتك وشغلك وكل حاجة عنك و ده برده موضوع طويل و هيبقى له سلسلة لوحده ان شاء الله 
-------------------------------------
للناس المهتمه بالبرمجة والديزاين وال Computer Science عموما .. فى مواقع اسئلة واجوبة حاول تعمل عليها شخصية وسمعه ليك عن طريق اجاباتك وافادتك للناس بصورة واضحه جدا يعنى حاول تخصص جزء من وقتك فى اليوم انك تدخل ترد ع الاستفسارات دى بحيث تعرف الناس برده عليك المواقع دى زى Stackoverflow – Yahoo Answers وغيرهم ... 
-------------------------------------
الخاتمه والمخلص : انك حاول تشهر نفسك بأى طريقه من الطرق السابقه او غيرها بحيث خدماتك توصل لاكبر عدد من الناس .. 

يارب تكونوا استفادتم من المقال ده و اكون وضحت ليكم نقاط مهمه ..
(اى حاجة قولت عليها هتتوضح لوحدها فى دى هيبقى ليها مقال او مجموعة مقالات على النقطه او الحاجة دى بس )
والسلام عليكم ورحمه الله وبركاته

[فرى لانسنج][الجزء الاول][المفهوم ؟؟؟]


  • اول حاجة لازم نعرفها ف الاول يعنى ايه Freelancing وهل هو معتمد على مجال معين او لاشخاص بعينهم .. معنى الفرى لانسنج انى بقدم خدمة بمقابل مادى , الخدمة دى ممكن تقعد ساعه يوم شهر على حسب حجم المشروع .. طبعا الخدمة مش مقتصره على مجال معين ممكن يبقى برمجة تصميم كتابة ترمجة وهكذا ... طالما بقدر اعمل خدمة بمقابل مادى .. تانى حاجة لازم الشخص اللى بيدخل فى الفرى لانسنج يكون عنده خبره كويسه جدا فى المجال اللى هو هيشتغل فيه بحيث يبقى مدرك الاخطاء اللى ممكن يقع فيها لان انت دلوقتى " حر نفسك " و انت اللى بتتعامل مع العملا مباشرة يعنى انت اللى بتدير المشروع و دى مش اى حد يقدر يستحملها

    ازاى اجهز لنفسى عشان اقدر ابقه Freelancer
    -----------------------------------------------------
    كده احنا عرفنا معنى الفرى لانسنج و وايه المقصود بيها .. دلوقتى عايزين نعرف ازاى اجهز نفسى للموضوع ده ؟؟!! اول حاجة انك تشهر نفسك فى مجالك على اوسع نطاق وهنا بقه يجى اكتر من حاجة زى مثلا
    *** مواقع التواصل الاجتماعى : انى اتكلم مع ناس فى نفس مجالى واكتر من خبرة عشان اعرف ازاى وصلوا للخبره دى .. اتناقش مع ناس فى جروبات فى مشاكل معينه .. ارد على استفسارات ناس وهكذا .. تانى حاجة انى ممكن اعمل بيدج و انشر عليها اعمالى بأستمرار وافيد الناس وبرده انا استفيد , دى حاجة مختصرة عن اهمية ال Social Media .. يعنى ركز كل طاقتك ومجهودك وبرده شغلك على حاجة معينه زى مثلا Facebook , Twitter , Google+, LinkedIn وغيرهم
    *** موقع شخصى : النقطه دى فى غاية الاهمية لاكتر من سبب ان انت بتنشر اعمالك على الموقع بأستمرار وبتخلى الناس توصلك بسهولة على طريق محركات البحث و ده فى حد ذاته من اهم النقاط عشان تشهر نفسك فى مجالك
    *** الكروت الشخصية: الموضوع ده يمكن يكون فات عليه الزمن شوية لكن لسا فيه ناس كتير بتستخدمه على نطاق معين لان انت بتحاول تشهر نفسك وتعرف الناس عليك فى حدود منطقه معينه مش كل الناس
    *** لوجو شخصى : حاول تعمل ليك لوجو او حاجة زى Watermark تبقى على اعمالك بحيث اللى يشوفه يعرف انك عامله وبتأكد من ده
    دى طبعا بعض الحاجات اللى بتساهم بشكل كبيييير جداااا فى انك توصل للناس بسهولة وخصوصا العملاء لو انت استغلت النقط اللى فاتت دى صح ف انت كده ماشى ناحية هدفك بسهولة وبسرعه ان شاء الله

    و دى كانت نبذة بسيطه جدا عن موضوع الفرى لانسنج و ايه هو وازاى اهيأ نفسى له .. اتمنى يكون عجبكم المقال و أسف ع الاطالة .. هستنى ردكم و ارائكم فى الكلام ده .. وان شاء لله المقال الجاى هيبقى عن " ازاى اجيب العملاء " عشان ابدأ اشتغل فى مجالى
    والسلام عليكم ورحمه الله وبركاته

Disqus for TH3 PROFessional